Düşünmürəm ki, Rusiya-Türkiyə münasibətlərinin yaxşılaşması "Türk axını" layihəsini yenidən gündəmə gətirəcək.

Bu sözləri Axar.az-a açıqlamasında iqtisadçı alim Vüqar Bayramov deyib. Türkiyənin Rusiya ilə barışması fonunda iki ölkənin ortaq layihəsi olan "Türk axını"nın yenidən gündəmə gəlmə ehtimalını şərh edən ekspert hesab edir ki, münasibətlərin yaxşılaşması kəmərin reallaşmasına təsir etməyəcək:

"Türk axını" layihəsi münasibətlər pisləşməzdən öncə gündəmdən çıxmışdı. Bunun səbəbi layihənin çox bahalı olması və bazarın konkret müəyyənləşdirilməməsi ilə bağlı idi. Nəzərə alsaq ki, bu layihə Türkiyə vasitəsilə Avropaya çıxmalı olan qazın nəqlini nəzərdə tuturdu. Praktik olaraq da Avropa-Rusiya münasibətlərinin gərginləşməsi layihənin taleyini sual altında qoydu. Yalnız Rusiyanın deyil, eyni zamanda, hazırda Türkiyənin də maliyyə durumu yaxşı deyil. Hər iki ölkənin iqtisadi və maliyyə vəziyyəti yaxın gələcəkdə belə bir bahalı layihəni maliyyələşdirməyə imkan vermir".

İqtisadçı daha bir məsələyə, Ankara-Moskva yaxınlaşmasının Rusiya bazarında Azərbaycana təsirlərindən də söz açıb:

"Təbii ki, iki ölkə arasında münasibətlərin normallaşması Azərbaycan üçün vacibdir. Bu, strateji baxımdan Azərbaycanın maraqlarına təsir göstərir. Türkiyə Rusiya bazarını tərk etdikdən sonra Azərbaycan qısamüddətli dövrdə bu bazara daxil olmuşdu. Türkiyənin yenidən Rusiya bazarına qayıtması iqtisadi baxımdan ölkəmizə müəyyən qədər təsir göstərə bilər. Ancaq söhbət elə də böyük təsirlərdən getmir. Strateji baxımdan iki ölkənin münasibətlərinin əvvəlki qaydasına düşməsi Bakı üçün daha əhəmiyyətlidir".

Qeyd edək ki, Türkiyə Prezidenti Rəcəb Tayyib Ərdoğan bir müddət öncə rusiyalı həmkarına məktub yazaraq, Su-24 hadisəsinə görə təəssüfləndiyini, iki ölkə arasında münasibətlərin normallaşdırılması üçün heç vaxt diplomatik kanalları bağlamadığını bildirib. Bundan sonra isə iki ölkə arasında münasibətlər qaydaya düşməyə başlayıb.

Liderlər məlum hadisədən sonra ilk dəfə Sankt-Peterburqda avqustun 9-da bir araya gələcəklər.