İstanbulda Ənvər Paşanın nəvəsi Arzu Ənvərlə gözəl görüş və fikir mübadiləsi oldu.

Axar.az xəbər verir ki, bu haqda millət vəkili Qənirə Paşayeva yazıb. O, Ənvər, Nuru və Xəlil Paşa ailəsinin layiqli davamçılarından olan Arzu Ənvərlə görüşü ilə bağlı fikrilərini bölüşüb:

"Arzu xanım dədələri kimi Azərbaycanı və türk dünyasını çox sevən bir insan, aydındır. Azərbaycan, Azərbaycan-Türkiyə münasibətləri, türk dünyası birliyinin vacibliyi ilə bağlı geniş fikir mübadiləsi apardıq. Azərbaycana dəvətimizi böyük məmuniyyətlə qəbul etdi. İnşallah, yaxın zamanlarda birlikdə maraqlı tədbirlər təşkil edəcəyik və ölkəmizə gələcək. Azərbaycan üçün böyük fədakarlıqlar etmiş Nuru, Xəlil və Ənvər Paşa ailəsinin davamçıları üçün bura bizim qədər onların da vətənidir. Arzu xanımda Azərbaycana belə bir məhəbbətin olduğunu görmək çətin deyildi".

Millət vəkili Ənvər Paşanın ən dəyərli şəxsi əşyalarından birini ona hədiyyə etdiyi üçün Arzu xanıma təşəkkür edib və bu hədiyyənin çox böyük və önəmli olduğunu deyib:

"Bu dəyərli hədiyyəni muzeylərimizdən birinə hədiyyə edəcəyimi bildirdikdə isə Azərbaycanın dədələrinə verdiyi dəyər və vəfakarlıqlardan çox duyğulandığını deyən Arzu xanım bir daha təşəkkür edərək salam və sevgilərini göndərdi".