Qivi Tarqamadzenin avtomobilinə bomba qoyulması Gürcüstana qarşı provokasiyadır.

Axar.az xəbər verir ki, bunu jurnalistlərə açıqlamasında Gürcüstan Baş naziri Georgi Kvirikaşvili söyləyib. Onun sözlərinə görə, bu hadisə Gürcüstanın düşmənləri tərəfindən parlament seçkisi öncəsi ölkədəki situasiyanı destablizasiya etmək üçün planlaşdırılıb:

"Artıq bununla bağlı araşdırma başlanılıb. Provokasiyanı planlaşdıranlar buna görə mütləq cavab verəcəklər. Cinayətkarı hansısa güzəştli statusu və ya başqa ölkənin vətəndaşlığı qoruya bilməz".

Qeyd edək ki, Tarqamadze Saakaşvilinin ən yaxın adamlarından hesab edilir. O, 2003-cü ildə baş tutan Qızılgül inqilabının əsas ideoloqu sayılır. 2013-cü ildə o, Rusiyada qiyabi olaraq həbs edilib. Moskvanın iddiasına görə, məhz Tarqamadze 2012-ci ildə Rusiyada baş verən mitinqlərin əsas təşkilatçısı olub.

Ötən gün Tiflisdə onun maşını partladılıb, hazırda sürücüsü ağır vəziyyətdədir.