Qara dənizdə iki gəmiyə pilotsuz uçuş aparatlarının hücumu baş verib, onlardan biri batıb.

Axar.az Report-a istinadla xəbər verir ki, bu barədə Bolqarıstanın Baş naziri Rumen Radev məlumat yayıb.

Bildirilib ki, gəmilərdən birinin heyət üzvləri arasında Azərbaycanın 8 vətəndaşı olub.

Onun sözlərinə görə, Malta bayrağı altında üzən "Chelsea 3" gəmisi Bolqarıstanın Byala şəhərindən 18 dəniz mili şərqdə üç PUA-nın hücumuna məruz qalıb.

"Bolqarıstanın ərazi sularının birbaşa yaxınlığında ticarət gəmilərinə növbəti hücum qətiyyən yolverilməzdir", - baş nazir deyib.

Aralarında Ukraynanın 7 və Azərbaycanın 8 vətəndaşının olduğu 15 heyət üzvünün hamısı xilas edilib. Onlardan beşi yüngül xəsarətlər alıb.

R.Radevin sözlərinə görə, ikinci gəmi Krapets yaşayış məntəqəsindən 17 dəniz mili şərqdə hücuma məruz qalıb və batıb. Heyət üzvlərindən birini xilas etmək mümkün olub.

Baş nazir əlavə edib ki, Bolqarıstan PUA-nın hansı ölkəyə mənsub olduğunu müəyyən etmək üçün beynəlxalq yardım almağa çalışacaq. Bununla yanaşı, o vurğulayıb ki, Sofiyanın hələlik hər hansı tərəfi ittiham etmək üçün əlində sübutları yoxdur.