Dağlıq Qarabağ münaqişəsinin həlli ilə bağlı yeni icra mexanizmi hazırlanmalıdır.

Bu sözləri Axar.az-a açıqlamasında politoloq Arzu Nağıyev deyib. Ekspertin sözlərinə görə, Azərbaycan öz ərazi bütövlüyü çərçivəsində ermənilərlə status məsələsi ilə bağlı müzakirələr aparmağa hazırdır:

"Təəssüf ki, Ermənistan Dağlıq Qarabağ ərazisindəki separatçı qüvvələrə müstəqillik sözü verib. Ona görə də münaqişənin həllində problemlər yaranır. Ermənilər isə bu situasiyadan istifadə edirək bir sıra siyasi gedişlər edirlər. Köhnə ampulasında olan Ermənistan indi də güc nümayiş etdirməyə cəhd göstərir. Məqsəd isə təbii ki, danışıqlar masasından boyun qaçırmaqdır. Serj Sərkisyan hazırda siyasi manevrlər etməklə öz hakimiyyətinin ömrünü uzatmaqla məşğuldur. Hesab edirəm ki, Dağlıq Qarabağ münaqişəsinin həllində müvafiq addımlar atılmalı, beynəlxalq təşkilatlar, maraqlı dövlətlər öz sözlərini deməli, ATƏT-in Minsk Qrupu problemə daha ciddi yanaşmalıdır. Vaxt daralır, ona görə də münaqişənin həlli istiqamətində səylər gücləndirilməlidir".