Ana səhifə Gündəm |
Bu “referendum” mənasız bir iş olsa da, bölgədə gərginliyi artıra bilər. Ermənistanın belə bir həssas dönəmdə təxribatları davam etdirməsinin yalnız bir anlamı var, o da bilərəkdən müharibənin başlanmasına rəvac verməkdir.
Bunu Axar.az-a işğal olunmuş Azərbaycan torpaqlarında Qarabağ separatçılarının “konstitusiya islahatları” ilə bağlı “referendum” keçirməsini şərh edən politoloq Elxan Şahinoğlu deyib. Politoloq bildirib ki, bu, reallıqda durumu dəyişməsə də, vəziyyəti gərginləşdirəcək:
“Bir tərəfdən “sülh”də maraqlı olduqlarını deyirlər, digər tərəfdən isə təxribatlarla məşğuldurlar. Mən gözləyirdim ki, ATƏT-in Minsk Qrupu İrəvanın bu addımını danışıqlara mane olacaq bir element kimi görəcək və bu məsələyə dərhal kəskin etirazını bildirəcək. Çox təəssüf ki, beynəlxalq aləm də bu təxribata adekvat reaksiya vermir. Bu halla barışmayacağıq. Azərbaycan artıq taktikasını dəyişib və Dağlıq Qarabağ ətrafındakı işğalçı qüvvələrin bütün postları, canlı və hərbi texnikası hədəfə alınır. Görünür, yenidən vəziyyəti bilərəkdən gərginləşdirməkdə maraqlıdırlar. Bu “referendum” çox mənasız bir iş olsa da, bölgədə gərginliyi artıracaq. Ermənistan bu təxribatı davam etdirməklə, əslində, müharibənin başlanmasına birbaşa rəvac verir”.
Qeyd edək ki, Ermənistan fevralın 20-də işğal olunmuş Azərbaycan torpaqlarında yaratdığı separatçı qurumda “konstitusiya islahatları” ilə bağlı əldəqayırma və hüquqa zidd referendum keçirəcək.
Tarix
2017.02.17 / 08:45
|
Müəllif
Aygün Yusibova
|