İranın Azərbaycan vilayətində baş verən daşqınlar zamanı itkin düşən daha bir nəfərin cəsədi aşkar edilib.

Axar.az xəbər verir ki, bunu “Mehr” agentliyinə açıqlamasında Şərqi Azərbaycan Böhran Mərkəzinin rəisi Xəlil Sai söyləyib. O, cəsədi aşkar edilən şəxsin 18 aylıq körpə olduğunu bildirib. Onun cəsədi daşqından 12 gün sonra Dizə kəndi yaxınlığında tapılıb. Bununla Əcəbşirdə itkin düşən bütün şəxslərin cəsədləri aşkar edilib.

Qeyd edək ki, aprelin 14-də Azərbaycan vilayətində güclü daşqınlar olub. Güclü daşqınlar ən çox Əcəbşir, Azərşəhr, Marağa, Sərab və Urmiyada müşahidə edilib. Təbii fəlakət ümumilikdə 49 şəxsin ölümünə səbəb olub. Daşqınlara görə İran parlamentindəki azərbaycanlı millət vəkilləri hökuməti kəskin tənqid ediblər.