Təbrizin İran parlamentindəki millət vəkili Məhəmməd Hüseyn Fərhəngi “Fars” xəbər agentliyinə verdiyi müsahibədə Şərqi Azərbaycan əyalətinin prioritet məsələlərini sadalayıb.

Axar.az xəbər verir ki, o, Məcid Xudabəxşin Şərqi Azərbaycanın valisi postuna təyin edilməsi məsələsinə də toxunub.

“Artıq Şərqi Azərbaycan üçün yeni vali təyin edilib. Hesab edirəm ki, qarşıdakı ən əsas məsələ əyalətin inkişafı olmalıdır. İnkişaf isə abadlaşdırma, sənaye, mədən, əkinçilik, elm və təlim sahələrini əhatə edir”, - o deyib.

Azərbaycanlı millət vəkili azəri türkcəsinin tədris edilməsini də əyalətin prioritet məsələlərindən biri olduğunu deyib. O bildirib ki, hökumət bu barədə müəyyən vədlər verib, bu istiqamətdə ilkin addımlar da atılıb. Lakin prosesi daha da sürətləndirmək lazımdır.

İran Konstitusiyasının 15-ci maddəsinə əsasən, ölkənin təhsil ocaqlarında qeyri-fars millətlərinin ana dili tədris oluna bilər. Lakin islam inqilabından sonra yazılan Konstitusiyanın 15-ci maddəsi hələ də icra olunmayıb.