Ölkəmizin inkişafını, dünyanın enerji və nəqliyyat dəhlizləri sistemində mühüm rola sahiblənməsini qəbul edə bilməyən dairələr məqsədyönlü şəkildə Azərbaycanda sabitliyi pozmağa cəhd göstərirlər.

Bu sözləri Axar.az-a açıqlamasında ötən gün Azərbaycanda terror aktları planlaşdıran bir qrup dini ekstremistin Dövlət Təhlükəsizliyi Xidməti tərəfindən (DTX) yerindəcə məhv edilməsi ilə bağlı danışan analitik Elçin Mirzəbəyli deyib. Analitik bildirib ki, Dövlət Təhlükəsizlik Xidmətinin həyata keçirdiyi mühüm əməliyyatlar, ölkənin ictimai-siyasi təhlükəsizliyini hədəfə alan olduqca ciddi bir təxribatın qarşısının alınması yüksək dəyərləndirilməlidir:

“İctimai-siyasi sabitliyin qorunması istənilən dövlət üçün mühüm əhəmiyyət kəsb edir. Azərbaycan bu günədək əldə etdiyi uğurlara məhz sabitliyin təmin olunması, ictimai təhlükəsizliyin qorunması sayəsində nail olub. Sabitliyin qorunması əldə etdiyimiz bütün uğurların təməlini təşkil edir. Bu baxımdan ölkəmizin inkişafını, dünyanın enerji və nəqliyyat dəhlizləri sistemində mühüm rola sahiblənməsini qəbul edə bilməyən dairələr məqsədyönlü şəkildə Azərbaycanda sabitliyi pozmağa cəhd göstərirlər. Bildiyiniz kimi, bir neçə gündən sonra Azərbaycanda uzun illərdən bəri gözlədiyimiz, müstəqillik tariximizin ən böyük uğurlarından biri olan Bakı-Tiflis-Qars dəmir yolu layihəsinin açılışı olacaq. Bu layihə bizim çoxsaylı nəqliyyat dəhlizlərinin mərkəzində yer almağımıza, Şərqlə Qərb, Cənubla Şimal arasında mühüm bir körpü rolu oynamağımıza imkan verəcək. Şübhəsiz ki, bu proselərdən kənarda qalan, yaxud Azərbaycanın uğurlarını qısqanclıqla qarşılayan qüvvələr nəyin bahasına olursa olsun, bu və ya digər layihələrdən əldə edəcəyimiz dividentlərə öncədən zərbə vurmağa çalışır, Azərbaycan haqqında “qeyri-sabit ölkə” imicini formalaşdırmağa cəhd göstərirlər. Dövlət Təhlükəsizlik Xidmətinin həyata keçirdiyi əməliyyatlar isə bir daha sübuta yetirdi ki, Azərbaycan dövləti vətəndaşlarının təhlükəsizliyini təmin etmək, ictimai təhlükəsizliyimizi hədəfə alan qüvvələri yerindəcə zərərsizləşdirmək iqtidarındadır”.

Qeyd edək ki, ötən gün DTX Milli Şuranın mitinqində partlayış törətməyi planlaşdıran 3 terrorçunu zərərsizləşdirib.