Ukraynada Qərbin tələbi ilə olsa da, Milli Antikorrupsiya Bürosunun yaradılması inqilabın daha bir nailiyyətlərindəndir.

Axar.az xəbər verir ki, bu sözləri politoloq Şahin Cəfərli Ukraynanın Daxili İşlər naziri, erməni əsilli Arsen Avakovun oğlunun həbsinə münasibətində qeyd edib. Onun sözlərinə görə, büro hökumətdən asılı olmayan və istintaq aparmaq, cinayət təqibi həyata keçirmək səlahiyyətinə malik müstəqil qurumdur:

"Bu gün Milli Antikorrupsiya Bürosunun detektivləri daxili işlər naziri Arsen Avakovun oğlunu və nazirin keçmiş müavinini saxlayıblar. Saxlanılanlar DİN tərəfindən həyata keçirilən satınalmalar zamanı mənimsəmələrə yol verməkdə ittiham olunur. Büro bundan əvvəl Müdafiə nazirinin müavini, Dövlət Fiskal (gömrük-vergi) Xidmətinin rəhbəri kimi yüksək vəzifəli dövlət məmurlarını həbs etmişdi. Daxili işlər nazirinin oğlunun saxlanılması hər halda, Ukraynada bir şeylərin dəyişməyə başladığını göstərir. Amma demokratik, hüquqi dövlət qurmaq uzun və məşəqqətli yoldur”.

Ş.Cəfərli bildirib ki, hazırda bu qurum ümumilikdə 3 milyard dollardan çox oğurluq faktları ilə bağlı cinayət işlərini araşdırır:

“Lakin əsas problem köhnə dövrdən qalan korrupsiyalaşmış məhkəmə sistemidir. Məhkəmələr saxlanılan vəzifəliləri, imkanlıları qanundakı müxtəlif boşluqlardan (məsələn, girovqoyma) istifadə edərək sərbəst buraxır. Ona görə, Qərb tələb edir ki, ənənəvi sistem islah olunana qədər xüsusi antikorrupsiya məhkəmələri yaradılsın və Antikorrupsiya Bürosunun araşdırdığı cinayət dosyeləri bu məhkəmələrə təqdim olunsun”.