Ana səhifə Gündəm |
Türkiyə Prezidenti Rəcəb Tayyib Ərdoğanın illər sonra Vatikana səfər etmək qərarına gəlməsi Vatikana olan minnətdarlıq kimi qəbul olunmalıdır.
Bu sözləri Türkiyənin İstinye Universitetinin professoru, türk analitik və politoloq Məsud Haqqı Çaşın Türkiyə Prezidenti Rəcəb Tayyib Ərdoğanın Vatikana səfəri haqda Axar.az-a danışarkən deyib. Onun sözlərinə görə, Yaxın Şərqdə baş verən bu gərginlik ərəfəsində belə bir səfərin tarixi əhəmiyyəti var:
“Tərəflərin görüşünün əsas müzakirə mövzusu Suriya və İraqla yanaşı, Qüds də olacaq. Hər kəs bilir ki, bu torpaqlar türk xalqına nə qədər yaxın, doğmadır. Hələ Osmanlı zamanından bu torpaqlar bizim üçün müqəddəs və dəyərli torpaqlar olub. Osmanlının bu şəhər üçün bütün gücü ilə vuruşması təsadüfi xarakter daşımırdı.
Türkiyənin Qüds siyasətində Fələstini dəstəkləməsi olduqca təbii və təqdirəlayiqdir. Vatikan ABŞ Prezidenti Donald Trampın atdığı anormal addımlardan fərqli olaraq Türkiyənin mövqeyinə hörmətlə yanaşdı, bu da “təşəkkür səfəri”nə layiq görüldü. İkinci bir tərəfdən, bu səfər hazırda bəzi qüvvələr tərəfindən təbliğatı aparılan islamafobiyaya da zərbə olacaq”.
Xatırladaq ki, Türkiyə Prezidenti Rəcəb Tayyib Ərdoğan 59 il sonra Vatikana səfər edəcək.
Tarix
2018.01.17 / 08:00
|
Müəllif
Rəfiqə Əlisəfa
|