Növbədənkənar prezident seçkilərinin elan edilməsi qərarını çox müsbət qiymətləndirirəm.

Bu sözləri Axar.az-a Prezident İlham Əliyevin növbədənkənar prezident seçkilərinin elan edilməsi haqqında verdiyi sərəncamla bağlı danışan Milli Məclisin Hüquq siyasəti və dövlət quruculuğu komitəsinin sədr müavini Rövşən Rzayev deyib. Millət vəkili qeyd edib ki, sərəncama müvafiq olaraq Mərkəzi Seçki Komissiyasına tapşırıqlar verilib və bütün bunlar da qanun çərçivəsindədir:

“Aprelin 11-də prezident seçkiləri keçiriləcək və buna müvafiq olaraq da MSK fəaliyyət göstərəcək. Biz də böyük məmnuniyyətlə və bütün dəstəyimizlə seçkidə iştirak edəcəyik. O ki qaldı qərarın hansı zərurətdən verilməsinə, bu, birbaşa prezidentin səlahiyyətində olan məsələdir. Qanuna müvafiq sərəncam imzalanıb və bu sərəncama da uyğun olaraq bütün aidiyyəti qurumlar öz fəaliyyətini davam etdirəcək. Hesab edirəm ki, dövlət başçısı Azərbaycana bundan sonrakı rəhbərliyi dövründə də struktur islahatlarını davam etdirəcək. Azərbaycanın xalqının daha da firavan yaşaması, dövlətin güclənməsi və ərazi bütövlüyümüzün təmin olunmasından ötrü cənab prezident bütün imkanlarından bugünə qədər uğurla istifadə edib, bu siyasətini bundan sonra da davam etdirəcək”.

R.Rzayev hər bir Azərbaycan vətəndaşını prezidentin ətrafında sıx birləşməyə çağırıb:

“Ölkə rəhbərinin növbədənkənar prezident seçkisi qərarı Dağlıq Qarabağ münaqişəsinin həlli və ərazi bütövlüyümüz baxımından da mühüm əhəmiyyət kəsb edir. Dövlət başçsının apardığı siyasət ulu öndər Heydər Əliyevin siyasətinin davamıdır. Bu, ərazi bütövlüyünü təmin edə biləcək yeganə və dönməz yoldur”.

Qeyd edək ki, Azərbaycan Respublikası Prezidenti İlham Əliyev növbədənkənar Azərbaycan Respublikası Prezidenti seçkilərinin elan edilməsi haqqında sərəncam imzalayıb.