19:38

Rusiya Prezidenti Vladimir Putin Azərbaycan Prezidenti İlham Əliyevlə görüşdən sonra bu gün Soçidə Serj Sərkisyanla da görüşüb.

Axar.az xəbər verir ki, görüşdə Rusiya-Ermənistan münasibətləri və Dağlıq Qarabağ münaqişəsinin nizamlanması məsələsi müzakirə olunub.

Ermənistanla münasibətləri dost, strateji əməkdaşlıq kimi xarakterizə edən Putin İrəvanın Gömrük İttifaqına və Avrasiya İttifaqına qoşulmaqla bağlı qərarına toxunub. Bildirib ki, bu məsələdə son vəziyyət, o cümlədən Qarabağ probleminin nizamlanması ilə bağlı müzakirələr aparacaqlar.

Üç ay əvvəl görüşdüklərini xatırladan Serj Sərkisyan bəzi razılaşmaları tamamlamağın vaxtı çatdığını bildirib: "İnteqrasiya prosesi, konkret desək, Avrasiya İqtisadi İttifaqına Ermənistanın qoşulması ilə bağlı bəzi məsələləri müzakirə etməyə ehtiyac duyuram.

Əlbəttə, bizi Ukraynadakı situasiya narahat edir. Əgər vacib hesab etsəz, Rusiyanın bu məsələdə aldığı qərarlar barədə məlumat verərsiniz, mən isə öz növbəmdə bizim regiondakı durum və Azərbaycan-Ermənistan sərhəddində və təmas xəttində vəziyyəti Azərbaycanın qızışdırmasının səbəbləri haqda sizə geniş məlumat verəcəyəm".