Avropa Birliyi Şərqi Tərəfdaşlıq Proqramı Vətəndaş Cəmiyyəti Forumu Azərbaycanla əlaqəli mübahisəli "siyasi dustaqlar" ilə bağlı broşüranı öz internet səhifəsindən yığışdırıb.

Bu haqda Axar.az-a Forumun həmsədri, iqtisadçı alim Vüqar Bayramov bildirib. O, deyib ki, ötən həftə Avropa Birliyi Şərqi Tərəfdaşlıq Proqramı Vətəndaş Cəmiyyətinin Azərbaycan üzrə Milli Platforması bəyanat qəbul edərək, həmin sənədin Forumun internet səhifəsindən yığışdırılmasını istəmişdi. Milli Platforma məsləhətləşmələr yolu ilə Azərbaycan ilə bağlı sənədlərin və eləcə də broşüraların hazırlanmasının vacibliyini bildirmişdi.

Forumun internet səhifəsindən sözügedən sənədin götürülməsi ilə bağlı qərarın qəbul edilməsinin müsbət addım olduğunu deyən Vüqar Bayramov bildirib ki, həmsədri olduğu beynəlxalq qurumun milli nümayəndəliklərlə məsləhətləşərək fəaliyyət həyata keçirməsi eyni zamanda yerli vətəndaş cəmiyyəti nümayəndələrinin fikirlərinin nəzərə alınması baxımdan vacibdir.

Xatırladaq, forum bir müddət öncə bu qurumda Azərbaycandan olan İdarə Heyəti üzvlərinin iştirakı olmadan "Azərbaycanda siyasi məhbuslar" adlı qondurma broşür hazırlayaraq, ölkədə guya 100 "siyasi məhbusun" olduğunu bildirmişdi.