"Rusiya təhlükəsi SSRİ dağıldıqdan sonra bu qədər açıq olmamışdı".

Bu sözləri Axar.az-a NATO Əməkdaşlıq İnstitutunun rəhbəri Fərrux Məmmədov Uels sammitini şərh edərkən söyləyib.

O, sammitin Azərbaycan üçün önəmli olduğunu bildirib:

"Uels Sammiti NATO ölkələri və tərəfdaş ölkələri üçün digər sammitlərdən fərqli və önəmli idi. Rusiya təhlükəsi SSRİ dağıldıqdan sonra bu qədər açıq olmamışdı. Sammitdə qəbul olunan bütün qərarlar müəyyən qlobal dəyişikliklərə gətirib çıxardacaq. Sammit həmçinin Cənubi Qafqaz ölkələri üçün də mühüm əhəmiyyət kəsb edirdi. NATO Gürcüstanla tərəfdaşlığını bir addım daha irəliyə apararaq xüsusi bir plan üzrə işləməyə qərar verdi. Bu, Gürcüstanı NATO-ya daha da yaxınlaşdırdı. Gürcüstan Qara Dəniz vasitəsi ilə dünya okeanına çıxa bilir deyə Gürcüstanda dəniz donanmasının yaradılması, NATO ilə bir yerdə yaxın perspektivdə olan məsələlərdəndir. Bütün bunlar Rusiyanın artıq heç bir beynəlxalq hüququ tanımayaraq açıq şəkildə işğalçılıq etməsindən sonra ortaya çıxan nəticədir. Əslində Rusiyanın yalançı isterikası elə özünü tələyə salmaqdan başqa bir şey deyil. Sammitdən sonra Amerikanın Müdafiə naziri - yeni Pentaqon şefi Çak Hegel də Tiflisdə rəsmi səfərdə oldu. Gürcüstanla hərbi sahədə mühüm sənədlər imzalandı. Bu, Amerika və NATO-nun regiona olan marağını və narahatlığını önə çəkir. Biz yaxın gələcəkdə Gürcüstanı NATO sıralarında görə biləcəyik. Cənubi Qafqazda donmuş münaqişələrin həll olunması NATO üçün önəmlidir və bunu sammitdə də vurğuladılar. Sammitdə imzalanan sənəddə Azərbaycan və Gürcüstanın ərazi bütövlüyü tanındı. Bu isə önəmlidir. Artıq müəyyən irəliləyişlər var. Azərbaycan hökuməti bu irəliləyişləri düzgün qiymətləndirə bilərsə və proseslərdə aktiv iştirak edib siyasi iradə nümayiş etdirərsə, o zaman bir daha qalib çıxma şansımız var".