Rusiya Liberal Demokrat Partiyasının (RLDP) sədri, Dövlət Şurasının üzvü, Rusiya Federasiyası Dövlət Dumasının deputatı Vladimir Jirinovski Azərbaycanda səfərdədir.

AzərTAc xəbər verir ki, rusiyalı siyasətçi sentyabrın 27-də Fəxri xiyabana gələrək, xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla anıb, məzarı önünə əklil qoyub.

Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə tər çiçəklər düzülüb.

RLDP-nin sədri zəmanəmizin böyük musiqiçisi, Azərbaycanın və SSRİ-nin Xalq Artisti Müslüm Maqomayevin də xatirəsini anıb, məzarı üzərinə güllər qoyub.

Sonra V.Jirinovski Şəhidlər xiyabanına gedərək, Azərbaycanın müstəqilliyi və ərazi bütövlüyü uğrunda canlarından keçən qəhrəman Vətən övladlarının xatirəsini anıb, "Əbədi məşəl" abidəsinin önünə əklil qoyub.

Bakının ən hündür nöqtəsindən Azərbaycan paytaxtının mənzərəsini seyr edən qonağa Şəhidlər xiyabanının tarixi, şəhərdə aparılan tikinti və abadlıq işləri barədə məlumat verilib.