"Məmurların əfəlliyi və beyinlərinin olmaması artıq birinci dəfə deyil ki, beynəlxalq skandala gətirib çıxarır".

Axar.az xəbər verir ki, bu açıqlamanı rusiyalı analitik, "Politrus.com" saytının rəhbəri Vitali Arkov öz Feysbuk səhifəsində yazıb. O, Dağıstan məmurlarının azərbaycanlı Sovet İttifaqı Qəhrəmanının büstünə etdikləri hörmətsizliyə görə cəzalandırılmalı olduğunu bildirib:

"Yəqin ki, uşaqlar üçün məhz parkın bu yerində fontan tikmək yaxşı addımdır. Amma qəhrəmanın büstünü ehtiyatla götürüb, parkın digər önəmli yerinə keçirməyə və burada onu yenidən restavrasiya etməyə nə maneçilik törədirdi? Amma bizdə vətənpərvərlik haqqında çox danışırlar və 9 May haqqında timsah gözyaşları axıdırlar. Məmurların əfəlliyi və beyinlərinin olmaması artıq birinci dəfə deyil ki, beynəlxalq skandala gətirib çıxarır. Ümid edirəm ki, cənab Ramazan Hacımuradoviç Abdullatipov tədbirlər görüb günahkarları cəzalandıracaq".

Qeyd edək ki, bir müddət öncə "Haqqın.az" saytı azərbaycan Sovet İttifaqı Qəhrəmanı Şəmsulla Əliyevin büstünün şəhər parkından Dərbənd şəhər meriyasının əmri ilə götürüldüyü haqqında məlumat yaymışdı. Məlumatda həmçinin büstün zibil qablarından birinə atıldığı və daha sonra azərbaycanlılar tərəfindən tapılaraq, kafelərdən birində yerləşdirildiyi söylənilmişdi.