Fransa və digər Avropa ölkələrinə yayılan “Sarı jiletlilər” etiraz aksiyalarında ABŞ-ın iştirakı heç şübhəsiz ki, var.

Bu sözləri Axar.az-a açıqlamasında politoloq Əhəd Məmmədli deyib. O bildirib ki, bu cür aksiyalar iki müstəvidə başlayır:

“Ya xaotik, ya da planlaşdırılmış şəkildə. Xaotik şəkildə olan üsyanlar davam etdikdə prosesə müxtəlif qüvvələr qoşulur və onu yönəltməyə cəhd edir. Digər tərəfdən, bu cür hərəkatlar əvvəlcədən planlaşdırılmış şəkildə baş verir. Buna "məxməri inqilab" deyilir. Əvvəlcədən planlaşdırılmış inqilab ssenarisi heç kəsə sirr deyil ki, Mərkəzi Kəşfiyyat İdarəsinin (MKİ) qurduğu bir layihədir. İllərdir MKİ müxtəlif ölkələrdə məxməri, narıncı inqilablar edib. Bu inqilablar Soros, NED, İRİ kimi fondların, QHT-lərin əlləri ilə edilir”.

Politoloq qeyd edib ki, Fransada baş verən “Sarı jiletlilər” hərəkatı da xaotik, yaxud planlaşdırılmış proses ola bilər:

“Hər iki halda heç şübhəsiz ki, ABŞ-ın Fransada gedən proseslərdə, dolayısı da olsa, iştirakı var”.

Qeyd edək ki, bir neçə gündür Fransada “Sarı jiletlilər” adlı hərəkat üzvləri yanacaq qiymətinin artımına və bunun fonunda iqtisadi vəziyyətin pisləşməsinə etiraz edir. Aksiyalar zamanı onlarla etirazçı və polis yaralanıb, yüzlərlə şəxs həbs edilib.