Bu şəkillərdə görünən gənclər Ukraynada yaşayan və təhsil alan azərbaycanlılardır. Onlar abbreviaturası Ukrayna dilində SUMO kimi yazılan və ana dilimizə Ukrayna Azərbaycanlı Gənclər Birliyi (UAGB) kimi çevrilən təşkilatın üzvləridir.

Təşkilatın lideri Əsgər Quliyevin musavat.com-a verdiyi xəbərə görə, onlar bu şəkilləri oktyabrın 23-də, "Dnepr"-"Qarabağ" oyunundan bir qədər əvvəl çəkdiriblər. Gənclər stadiona əllərində Azərbaycanın və Ukraynanın dövlət bayraqlarını, bir də tərcüməsi "Azərbaycan Qarabağla, Ukrayna Krımla tanınır dünyada" məzmunlu şüarlarla daxil olublar.

Ə.Quliyev qeyd edir ki, ancaq stadionun mühafizə xidməti şüarın siyasi xarakter daşıdığını qüyd edərək, onu stadiona buraxmaqdan imtina edib.

Qeyd edək ki, azərbaycanlı jurnalistlər də stadiona Aəzrbaycanın iri miqyaslı dövlət bayrağını keçirmək istəyərkən mühafizə xidmətinin və asayiş keşikçilərinin müqaviməti ilə üzləşmişdilər.