Abdullatipov Dərbəndin müvəqqəti idarəçiliyinə Yəhya Hacıyevi gətirməyə çalışır.

Axar.az xəbər verir ki, bu barədə informasiyanı "Çernovik" qəzeti özünün etibarlı mənbələrinə istinadən yayıb.

Qəzet Yəhya Hacıyevin "Tatlyar" aqrofirmasının direktor müavini olduğunu bildirib. Mənbə hazırda ev dustağı edilən Dərbənd meri Qurban Qurbanovun müavini Əli Xazbulatovun hələ də öz vəzifəsindən getmək üçün Prezident Administrasiyasının rəhbəri Ramazan Əliyevə tabe olmadığını deyib.

Qurban Qurbanovun yaşadığı ev isə hələ də mühasirədə saxlanılır. Axar.az-a daxil olan məlumata görə, Dağıstan Prezident Administrasiyasının rəhbəri Ramazan Əliyevin qüvvələri hazırda deputatları yığıb icra hakimiyyətində sessiya keçirmək istəyir. Məqsəd isə qeyri-qanuni yolla deputatların imzasını toplamaq və icra başçısı Q.Qurbanovu vəzifədən uzaqlaşdırmaqdır.

İcra Hakimiyyətinin işçiləri binaya buraxılmır. Yerli azərbaycanlılar isə rayon icra hakimiyyətinin binası önünə toplaşmağa davam edir.

Xatırladaq ki, proses dünən Administrasiya rəhbəri Ramazan Əliyevin bölgəyə səfəri ilə başlayıb. Dərbənd admistrasiyasının və Q.Qurbanovun evinin qarşısına polis və OMON qüvvələri yeridilib. OMON hələ ki, avtobuslarda oturub, müdaxilə etmir.