Ölkə başçısı Azərbaycanda aztəminatlı ailələr, qaçqın və köçkünlərdən tutmuş bütün təbəqələrə xüsusi diqqət göstərir.

Bu sözləri Axar.az-a Prezident İlham Əliyevin fiziki şəxslərin problemli kreditlərinin həlli ilə bağlı güzəşt qərarına münasibət bildirən Milli Məclisin Aqrar siyasət komitəsinin sədri Eldar İbrahimov deyib. Millət vəkili vurğulayıb ki, Prezidentin pensiya və maaş artımı qərarının ardınca problemli kreditlərin həllinə dair fərmanı çox böyük addımdır:

“Bu günə qədər 10 000 dollar və ya 17 000 manata qədər vaxtı keçmiş kredit borclarının ümumi həcmi 900 milyon manat, bu borclara hesablanmış faiz, dəbbə pulu və cərimələrin həcmi isə 750 milyon manat təşkil edir. Bu baxımdan 830 min insanı əhatə edəcək bu fərman çox böyük güzəşt qərarıdır. Hesab edirəm ki, Prezident burada ilk növbədə insan amilini nəzərə alıb. Bu siyasət Azərbaycan vətəndaşının mənafeyinin və maddi-rifah halının yüksəlməsinə xidmət edir. Qərarın ikinci mühüm və hüquqi əhəmiyyəti isə vaxtı keçmiş kredit borcları ilə bağlı məhkəmələrdəki 616 milyon manat həcmində olan iddiaların dayandırılması ilə bağlıdır”.

Komitə sədri bir vətəndaş və millət vəkili olaraq fərmana görə Prezidentə minnətdarlığını bildirib:

“Bu qədər böyük həcmli vəsait tələb edilən və bütün kateqoriyadan olan insanları əhatə edən qərarları sadəcə alqışlamaq olar. Əminəm ki, sosial islahatların davamı olacaq”.