ATƏT-in Minsk Qrupunun amerikalı həmsədri Ceyms Uorlik yaxın müddətdə Azərbaycan və Ermənistan XİN başçılarının görüşünün mümkünlüyünü dilə gətirib.

Axar.az xəbər verir ki, konfliktin sülhdən başqa nizamlanma yolunun olmadığını dilə gətirən Uorlik regiona səfərlərinin hələ dəqiqləşmədiyini də bildirib:

"Tərəflərin fikirlərini öyrənmək üçün vaxtaşırı olaraq bölgəyə səfərlər edirik. Hələlik növbəti səfərimizin vaxtı dəqiqləşməyib. Ancaq yaxın həftələrdə bizim tərəflərin XİN başçıları ilə görüşümüz gözlənilir. Ümid edirik ki, prezidentlər 2014-cü ilin oktyabrındakı Paris razılaşmasına uyğun olaraq dialoqu davam etdirəcəklər".

Xatırladaq ki, ötən ilin dekabr ayında keçirilən ATƏT-in Xarici İşlər Nazirləri Şurasının illik iclası çərçivəsində Azərbaycan və Ermənistan xarici işlər nazirləri arasında nəzərdə tutulan görüş baş tutmamışdı.

Azərbaycan Ermənistanın sülh danışıqlarını imitasiya etməsinə və konstruktiv dialoqa hazır olmadığına görə görüşləri əhəmiyyətsiz hesab edir.