İraq Türkman Cəbhəsinin sözçüsü və Kərkük El Məclisinin üzvü Əli Sadiq Mehdi 2003-cü ildə Kərkükdə silahı yerə qoymaqda səhv etdiklərini etiraf edib.

Axar.az xəbər verir ki, Ege Universitetinin Türk Dünyası Araşdırmaları İnstitutunda təşkil olunan konfransda danışan məclis üzvü Kərkükdə yaşayan türkmanların silahı yerə qoyduqdan sonra zülm gördüklərini deyib:

"Ən böyük səhvimiz 2003-cü ildə Kərkükdə silahı yerə qoymağımız oldu. Tək istəyimiz bir İraq vətəndaşı kimi yaşamaqdır. 70-ci illərdə Kərkükün hər yerində yalnız türkman həkim, vəkil, dərzi var idi. Səddam Hüseyn 2000-ci ilə qədər türkmanları aradan götürmək istəsə də, bunu bacarmadı. Təəssüf ki, bu, 2003-cü ildən sonra reallaşdı. Bizim sağımızda ərəblər, solumuzda kürdlər var. Kərkükdə vali kürddür. Hansı təşkilata gedirsənsə, "kürdsən, yoxsa türk?" - deyə soruşurlar. 2003-cü ildən sonra kürd peşmərgələri silah gücü ilə torpaqlarımızı əlimizdən aldı. Kərkükdə kürdlər kürdçülük edirsə, biz də türkçülük edəcəyik".

Türkmanların başqalarının damı altında yaşamaq istəmədiyini deyən təşkilat sözçüsü İŞİD-ə qarşı ən çox mübarizə aparan və ən çox itki verən də türkmanların olduğunu bildirib:

"Biz türkmanlar başqasının damı altında yaşamaq istəmirik. Bizə orada Türkiyə gözündən baxırlar. Əgər Türkiyə ilə əlaqələr yaxşı gedirsə, bizlə yaxşı davranırlar. Təəssüf ki, sünni və şiə savaşına türkmanlar təhrik olundu. İŞİD zülmündən qaçan türkmanlar Türkiyəyə sığınsa da, gözlədiyi dəstəyi almadı".