105 saylı Tovuz seçki dairəsindən deputatlığa namizəd Qənirə Paşayeva bu gün Qovlar şəhərində seçiciləri ilə görüş keçirib.

Axar.az xəbər verir ki, Mədəniyyət Evində baş tutan görüşdə çoxsaylı şəhər sakini iştirak edib və onlar yenidən Qənirə Paşayevaya etimad göstərəcəklərini bildiriblər.

Q.Paşayeva onlara bu dəyərinə və dəstəklərinə görə təşəkkür edib. O bildirib ki, bu 14 il ərzində ailənizin bir üzvü oldum, sevincinizə sevindim, kədərinizi paylaşdım, problemlərinizin həlli üçün əlimdən gələni etməyə çalışdım.

Q. Paşayeva Azərbaycanın bölgədə və dünyada artan nüfuzu, beynəlxalq siyasətdə Azərbaycanın rolu və yeri haqqında, bütün ölkədə, eləcə də Qovlar şəhərində cənab Prezidentimiz İlham Əliyevin rəhbərliyi ilə dövlət tərəfindən həyata keçirilmiş böyük işlər və həyata keçirilməsi nəzərdə tutulan layihələr barədə məlumat verib.

Q.Paşayeva görüş zamanı ona müraciət edən şəhər sakinlərini narahat edən bəzi problemləri də dinləyib və qaldırılan təkliflərlə bağlı hökumət qurumlarına müraciət edəcəyini deyib. Q.Paşayeva həmçinin bir sıra şəhid ailələri, müharibə veteranları və fiziki imkanları məhdud insanlarla da görüşüb, onların qayğıları ilə maraqlanıb.