Milli Məclisin bu gün keçirilən iclasında baş mövzu manatın ucuzlaşması olub. Axar.az deputatların milli məzənnənin dəyişməsi haqda çıxışlarından ən maraqlı sitatları hazırlayıb.

Zahid Oruc: "Mərkəzi Bankın qərarını dövlətimizin mənafeyinə uyğun hesab edirəm. Ona görə də mən bu qərarı açıq mətnlə müdafiə edirəm". Ziyad Səmədzadə: "Azərbaycan hökuməti manatın ucuzlaşmasından sonra yaranan vəziyyətlə bağlı sosial tədbirlər görməlidir. Qiymətlərin bahalaşmasına qarşı ciddi mübarizə üsulları müzakirə olunmalıdır". Qüdrət Həsənquliyev: "Fakt budur ki, ərzaq məhsullarının qiyməti bazarlarda xeyli dərəcədə artıb. Əsasən də gündəlik tələb olunan malların qiyməti artıb. Ona görə də hökumət bu barədə ciddi şəkildə düşünməlidir". Fazil Mustafa: "Əhaliyə dəyən ziyan ortadadır. Hökumət tərəfindən əhalinin aztəminatlı hissəsinə ümid yarada biləcək ciddi addımlar atılmalıdır. Ən azı təqaüdçülərin, hərbiçilərin, müəllimlərin və digərlərinin daha acınacaqlı vəziyyətə düşməməsi üçün anti-böhran tədbirləri görülməsi vacibdir".

Siyavuş Novruzov: "Hökumət bu məsələləri hesablayır. Hökumətin Milli Məclisdə hesabatı olacaq və o hesabatda görəcəyik ki, hansı addımlar atılır, hansı işlər görülür və nə nəylə əvəz olunur". Milli Məclisin sədri Oqtay Əsədov: "Fikirləşmək lazımdır ki, müharibə ola bilər. Biz rezervlərin hamısını məzənnəyə görə itirə bilmərik".