"Son zamanlar korrupsiya və inhisarçılıqla bağlı problemlərin pik həddə çatması, büdcədə Rusiyanın payının 2 dəfə, pul köçürmələrin isə 6 dəfə azalması iqtisadi durumu daha da ağırlaşdırdı".

Bu barədə Axar.az-a açıqlamasında ekspert Natiq Cəfərli danışıb. O, son günlər İrəvanda baş verənlərin fonunda ölkədə qərbmeyilli kütlələrin meydana gəldiyini bildirib:

"Ölkədəki elektrik şəbəkəsi demək olar ki, rus şirkətlərinin nəzarəti altındadır. Qiymət artmı ilə bağlı qərarı da məhz həmin şirkətlər verib. Ölkədə təkcə sosial-iqtisadi deyil, eyni zamanda, siyasi etirazlar da güclənir. Söhbət Rusiyanın dominant rolunun Ermənistanda qıcıq yaratmasından gedir. Yeni qərbyönlü kütlələr meydana gəlib ki, onlar da Ermənistanın gələcəyini Avropaya inteqrasiyada görürlər. Açığı, vəziyyətin hansı səmtdə inkişaf edəcəyini demək çox çətindir. Çünki proseslərdə Rusiyanın çox böyük rolu var. Vəziyyət kritik həddə çatsa, Rusiya Ermənistan siyasətinə müdaxilə edə və aksiyaları yatırmaqla özünə sərf edən hakimiyyəti qorumağa çalışa bilər. Əgər belə bir hal baş versə, bu, müvəqqəti olacaq. Etirazların səbəbi aradan qaldırılmasa və iqtisadi, siyasi, ictimai səbəblər getdikcə artsa, günün birində ermənilər istədikləri hökuməti formalaşdırmağa nail olacaqlar. Bu variantı nəzərdən qaçırmamaq lazımdır. Çünki Ermənistan demokratik dəyişikliklər baş versə, bu, bütün bölgəyə və Qarabağ məsələsinə də təsir göstərəcək. Azərbaycan bu məsələlərdə diqqətli olmalı, əleyhimizə çevrilə biləcək hər hansı bir addımı önləmək üçün tədbirlər görməliyik".