Ukraynada müharibə başlayandan bəri ilk dəfə mayın 16-da Moskvada KTMT liderlərinin sammiti keçirildi. Sammitdə Rusiya KTMT-yə üzv dövlətlərdən siyasi dəstək almaq istəyirdi.

Bu sözləri Axar.az-a rusiyalı hərbi analitik Aleksandr Xramçixin deyib.

“Vladimir Putinin bu Zirvə görüşündə çıxışından sonra deyə bilərik ki, bütün baş verənlər fonunda KTMT-nin müəyyən siyasi hadisələrə yanaşması dəyişəcək. KTMT-nin prosesə qoşulduğu Qazaxıstanla bağlı hadisəni xatırlayırıq. Kreml ən azı diplomatik mətnlər şəklində təşkilat üzvlərindən konkret dəstək almağa ümid edir. Eyni zamanda, Rusiya başa düşür ki, bu, çətin məsələdir, çünki Ukraynada müharibəyə başlamaq qərarı KTMT-dəki tərəfdaşlarla müzakirə olunmayıb. Burada yalnız Rusiya Prezidentinin planlarından ilk gündən xəbərdar olan Belarus Prezidenti Aleksandr Lukaşenko var. Hazırda KTMT-nin bu sammiti, o cümlədən Rusiyanın özü tərəfdaşlarını çətin vəziyyətə salıb. KTMT Ukraynaya hansısa sülhməramlı missiyanın göndərilməsi məsələsini qaldıra bilər. Bu kontekstdə xüsusilə çətin vəziyyətdə Qərblə yaxşı koordinasiyalı əlaqələri olan Nikol Paşinyan qalacaq”, - o bildirib.