İtaliyanın "La stampa" qəzetinin rəsmi saytında Azərbaycanın bu ölkədəki səfiri Vaqif Sadıqovun yazısı yerləşdirilib.

Axar.az xəbər verir ki, səfir V.Sadıqov italiyalı jurnalist Roberto Travanın Dağlıq Qarabağ münaqişəsi ilə bağlı daha öncə saytda yerləşdirilmiş məqaləsinə cavab yazıb.

Səfir italiyalı jurnalistin təhrif olunmuş faktlara əsaslanan yazısına bu fikirlərlə aydınlıq gətirib:

"Ermənistan-Azərbaycan, Dağlıq Qarabağ münaqişəsi jurnalistin vurğuladığı kimi dini zəmində baş verməyib. Azərbaycan tarixən də, bu gün də multietnik və multikonfessional bir ölkədir. Konstitusiyamızda dinindən asılı olmayaraq bütün vətəndaşlara bərabər hüquqlar verilir. Azərbaycanın Ermənistandan başqa bütün qonşu dövlətlərlə yüksək səviyyəli əlaqələri var. Qarabağ ərazisinin taleyi ilə bağlı yeganə həll yolu Azərbaycanın tərkibində olmaqla bu bölgəyə muxtariyyət statusunun verilməsidir".

V.Sadıqov bir daha oxucuların diqqətinə çatdırıb ki, münaqişə nəticəsində Azərbaycanın 20 faiz ərazisi Ermənistan tərəfindən işğal olunub, bir milyondan çox azərbaycanlı qaçqın və məcburi köçkünə çevrilib.

Səfir son zamanlar ciddi qaçqın böhranı ilə üzləşən Avropanın bu problemdən 20 ildən çoxdur ki əziyyət çəkən Azərbaycanı başa düşəcəyinə ümidvar olduğunu bildirib.