Hazırkı mərhələdə prezidentlərin görüşünə münasib zəmin yaranmayıb.

Bu sözləri Axar.az-a ilin sonunda Azərbaycan və Ermənistan prezidentlərinin gözlənilən görüşünü şərh edərkən politoloq Tofiq Abbasov deyib. O bildirib ki, rəsmi İrəvan hazırda var gücü ilə danışıqlar prosesinin birdəfəlik fiaskoya uğramasına çalışır:

"Diqqət çəkən məqam isə dağıdıcılıq işinə rəhbərlik edənin məhz Ermənistan Prezidenti Serj Sərkisyanın olmasıdır. Belə qeyri-sağlam, xəstə davranış bir neçə səciyyəvi məqama dəlalət edir. Əvvəla, Sərkisyan tək öz ölkəsində deyil, bölgədə xaos yaratmağa çalışır ki, bu da onun naqisliyini bütün çılpaqlığı ilə göstərir. Digər tərəfdən isə o bir həqiqətə işıq salır: siyasətə təsadüfi adamlar gələndə onların törətdiyi fəsadlar taleyüklü prosesləri ölü nöqtəyə sürükləyir. Belə olduqda Azərbaycanın sərgilədiyi soyuqqanlılıq ən düzgün mövqedir. Bu, imkan verir ki, beynəlxalq qüvvələr, vasitəçilər problemin nədən ibarət olduğunu görsünlər. Əgər rəsmi Bakı radikal gedişata üstünlük versə, onda heç kəs Azərbaycanı qınamağa cürət edə bilməyəcək. Sərkisyanın son bəyanatından sonra vasitəçilər qarşı tərəfin məsuliyyətlə davranmasını tələb etməlidirlər. Əks halda nizamasalma işi birdəfəlik iflasa uğraya və bölgədə vəziyyət daha da kəskinləşə bilər".

Qeyd edək ki, bu ilin sonunadək Azərbaycan və Ermənistan prezidentlərinin görüşü gözlənilir.