Rusiya Energetika naziri Aleksandr Novakın oktyabrın 21-də İrana səfəri ilə Avropa Birliyi, ABŞ və İran arasında neftlə bağlı sanksiyaların aradan qaldırılması ətrafında müzakirələrin eyni vaxta düşməsi təsadüf deyil.

Bu sözləri Axar.az-a açıqlamasında iqtisadçı ekspert Rəşad Həsənov deyib. İqtisadçı Rusiya Energetika nazirinin İrana səfərini Moskvanın yeni həmləsi hesab edir:

"Siyasi kurslar müəyyən qədər üst-üstə düşdüyündən Rusiya İrana hansısa formada təsir göstərmək üçün cəhdlər edəcək. Ancaq İranın neft sahəsində Rusiya ilə belə bir əməkdaşlığa hazır olduğunu düşünmürəm. Çünki son dövrlərdə İrana tətbiq edilən sanksiyalar bu ölkənin iqtisadiyyatı üçün çox ciddi problemlər yaradıb. İran məhz embarqoların aradan götürülməsi və dünya bazarına sərbəst çıxışın əldə edilməsi məqsədilə bir çox iddialarından əl çəkərək siyasətində korreksiya etmək məcburiyyətində qalıb. Danışıqların belə bir həddə çatdığı şəraitdə rəsmi Tehran müsbət yanaşma ortaya qoymayacaq. Ola bilsin ki, müəyyən sahələrdə razılıqlar əldə olunsun. Ancaq xüsusilə neftin ixracı ilə bağlı məsələdə Moskva Tehrana təsir göstərə bilməyəcək. Digər neft ölkələri bununla bağlı artıq preventiv tədbirlər görürlər. Səudiyyə Ərəbistanı Avropa bazarlarına daha aşağı qiymətlər təklif etməklə bu bazarları ələ keçirib payını artırmağa çalışır. Bununla yanaşı, İranın da dünya bazarına daxil olması Rusiyanın Avropanın ən böyük enerji təchizatçısı funksiyasını müəyyən qədər azaldacaq. Rusiya isə dominantlığını qoruyub saxlamaq üçün müxtəlif yollara əl atacaq. Ancaq bu səylər arzuolunan effekti verməyəcək. İran hər vəchlə Avropa Birliyi ölkələri və dünya birjaları ilə bazarların bugünkü diktəsi daxilində birbaşa münasibətlər qurmağa çalışacaq".

Qeyd edək ki, Rusiya Energetika naziri Aleksandr Novak oktyabrın 21-də İrana səfər edəcək. Bir müddət öncə isə İran mətbuatı Novakın səfəri zamanı Rusiya ilə İran arasında neft-qaz sahəsində qarşılıqlı əməkdaşlıq məsələlərinin müzakirə ediləcəyi haqqında informasiya yaymışdı.