Məhkum Əli İnsanovun qardaşının vəfat etməsi ilə əlaqədar yas mərasimində iştirakına razılıq verilməməsi barədə mətbuatda yayılmış məlumatlar həqiqəti əks etdirmir.

Bu barədə AzərTac-a Ədliyyə Nazirliyi Penitensiar Xidmətinin ictimaiyyətlə əlaqələr şöbəsindən məlumat verilib.

Məlumatda deyilir: "Onun vəkillərinin bu məsələ ilə bağlı müraciətinə Penitensiar Xidmətdə baxılıb. Humanizm və mərhəmət nümayiş etdirilərək müsbət qərar qəbul olunub və Ə.İnsanova mərasimdə iştirak etmək üçün icazə verilib. Lakin Ə.İnsanov özü bu imkandan istifadə etməkdən imtina edib.

Təəssüf ki, belə bir hüzn mərasimini öz maraqları naminə istifadə edən Ə.İnsanovun vəkilləri mətbuatda təhrif edilmiş məlumatlar yayıblar.

Penitensiar Xidmət hesab edir ki, bu kimi hadisədən sui-istifadə edilməsi heç cür mənəviyyata sığmır".