Məruzəçi Milica Markovuç Azərbaycanın Ermənistan tərəfindən işğal olunmuş ərazilərinə bitişik bölgələrimizdə ermənilərin qeyri-insani əməlləri nəticəsində yaranmış su problemi, onun insanlarımızın həyatına ciddi təsiri ilə bağlı geniş çıxış edərək, AŞPA-nın bu vəziyyətin aradan qaldırılması üçün addımlar atmalı olduğunu bildirdi.

Bu barədə Axar.az-a açıqlamasında millət vəkili Qənirə Paşayeva məlumat verib. Deputat bildirib ki, rəsmi İrəvanın qeyri-insani əməllərdən əl çəkməyə çağıran sənədin qəbulu böyük uğurdur:

"Azərbaycanın sərhədyanı rayonlarının sakinlərinin qəsdlə içməli sudan məhrum edilməsi" adlı sənəddə Ermənistanın işğalçılığı birmənalı şəkildə vurğulanır, insanlığa qarşı addımları, Sərsəng su anbarı ilə bağlı məsələ geniş şəkildə öz əksini tapır. Ermənistanı və onun nümayəndə heyətini kəskin tənqid edən məruzəçi rəsmi İrəvanın məsələni yerində araşdırmaq üçün onu işğal etdikləri Azərbaycan bölgələrinə buraxmadığı, məruzəçi ilə əməkdaşlıqdan imtina etdiyi səbəbindən şiddətlə qınadı. Ermənistan, erməni lobbisi və dəstəkçilərinin bütün səylərinə, düzəliş və təkliflərinə baxmayaraq, Azərbaycan torpaqlarının işğal faktı qəbul edilən sənəddə birmənalı şəkildə öz əksini tapdı. Ermənistanla bərabər onların Avropadakı dəstəkçilərinin də Azərbaycan əleyhinə çox çalışmasına baxmayaraq, belə bir sənədin qəbulu çox ciddi məsələdir. Azərbaycan bütün beynəlxalq təşkilatlarda işini daha da gücləndirir".