Türkiyənin "Sabah" qəzetinin əməli düşmən dəyirmanına su tökməyə hesablanıb. Bu, eyni zamanda, iki qardaş ölkə arasında nifaq salmaqdır.

Axar.az xəbər verir ki, bu sözləri millət vəkili Adil Əliyev deyib. A.Əliyev bildirib ki, bu gün iki ölkə arasında əlaqələrin inkişaf etdiyi bir vaxtda belə təxribatın törədilməsi qardaşlıq münasibətlərinə zərər gətirməkdir:

"Bundan öncə də "Sabah" qəzetinin Azərbaycana qarşı təxribatı olmuşdu və sonradan üzr istəyərək, təxribatlarını düzəltdilər. İnanırıq ki, növbəti belə səhv olmayacaq. Onu yaxşı bilirik ki, türk xalqı bizimlədir və türk ziyalısı buna öz etirazını bildirəcək. Bu gün dünya ictimaiyyəti Dağlıq Qarabağın Azərbaycanın tərkib hissəsi olduğunu bilir və qəbul edir. "Sabah" qəzetinin Dağlıq Qarabağı Azərbaycandan ayrı təqdim etməsi işğalçıya bəraət qazandırmaqdır".

Xatırladaq ki, Türkiyənin "Sabah" qəzetinin hazırladığı Dünya Turizm Forumu çərçivəsində keçirilən "nazirlər toplantısı" haqqında məqalədə Azərbaycanın Mədəniyyət və Turizm naziri Əbülfəs Qarayevin arxasında verilən Azərbaycanın xəritəsində Dağlıq Qarabağ bölgəsi göstərilməyib. Yalnız Azərbaycan XİN-in məsələyə reaksiyasından sonra yanlışlıq aradan qaldırılıb.