Rəsmi Bakının regionda hər hansı bir ittifaqda yer alacağına inanmıram.

Bunu artan Rusiya-Türkiyə gərginliyi fonunda Azərbaycanın hər hansı bir ittifaqda yer alması məsələsinə aydınlıq gətirərkən Axar.az- politoloq İlqar Vəlizadə deyib. Ekspert bildirib ki, Rusiya və Türkiyə arasında gərginlik hələ ki, kritik həddi keçməyib:

"Regionda hərbi ittifaqların yaranmasına əslində hüquqi əsas yoxdur. Məsələn, Türkiyə-Gürcüstan-Azərbaycan hərbi ittifaqından söz açılır. Ölkələr arasında siyasi əməkdaşlıq gücləndirilə bilər, ancaq hər hansı bir hərbi birlikdən söhbət gedə bilməz. Türkiyə NATO üzvüdür, Azərbaycan və Gürcüstan isə bu alyansın üzvü deyil. Rəsmi Bakı hər hansı bir hərbi blokda yer almayacaq. Lakin Azərbaycan Türkiyə ilə müttəfiqlik səviyyəsini daha da gücləndirə bilər. Hazırda Rusiya və Türkiyə arasında hərbi qarşıdurma mümkünsüzdür. Belə bir vəziyyətdə də çətin ki, Azərbaycan hansısa bir tərəfin planlarında yer alsın. İki ölkə arasındakı hərbi-siyasi gərginlik əlbəttə ki, Azərbaycanı da narahat edir. Gedişat göstərir ki, hökm sürən gərginlikdə üçüncü qüvvələr və Ermənistan maraqlıdır. İrəvan Moskvanı hərbi avantüralara çəkmək istəyir. Bu isə daha irimiqyaslı problemlərə yol aça bilər. Hələ ki, Rusiya və Türkiyə kritik həddi keçməyib. Ancaq iki ölkə arasındakı gərginlik bu xətti keçərsə, onda Azərbaycan müvafiq addımlar atmağa məcbur olacaq".