Ankara terrorunun arxasında duranlar Türkiyəni diz çökdürmək istəyən qüvvələrdir.

Bu sözləri Ankara teraktı fonunda Türkiyənin Suriya siyasətini dəyərləndirən Tofiq Abbasov Axar.az-a açıqlamasında deyib. Politoloq bildirib ki, sözügedən qüvvələr Türkiyəni xaosa çəkməklə bu ölkənin ərazisini hərc-mərcliyə sürükləməyə çalışırlar:

"Lakin belə bəd əməlləri törədənlər anlamırlar ki, Türkiyə özündə böyük qüvvəni tərənnüm edən məmləkətdir. Türk xalqı heç zaman imkan verməz ki, ölkəsi kimlərinsə oyun meydanına çevrilsin. Yaxın Şərqdə xaosun genişlənməsinə çalışan dairələr var və bu qüvvələr hazırda bir çox ölkələri ayaq altına almağı hədəf seçiblər. Ancaq bir məsələ var ki, Türkiyənin potensialı ilə zarafat etmək olmaz. Bu ölkə həmişə özünü müdafiə etmə qabiliyyətinə malik olub və bundan sonra da olacaq. İndiki vəziyyətdə əsas məsələ Türkiyə siyasi elitasının səhvlərə yol verməməsidir. Türkiyə ondan istifadə etmək istəyənlərə meydan vermədikcə öz təhlükəsizliyini qoruyub saxlayacaq".

Qeyd edək ki, 17 fevralda Ankarada baş verən teraktda 28 nəfər ölüb, 61 nəfər isə yaralanıb.