"Ermənistan və Azərbaycan arasında başlayacaq yeni müharibə 90-cı illərdəkindən tamamilə fərqlənəcək".

"Axar.az" xəbər verir ki, bu açıqlamanı Amerikalı politoloq Ueyn Meri Qarabağda müharibə olacağı ilə bağlı sualı cavablandırarkən verib.

O, tərəflərin hələlik qısa müddətli kiçik müharibə başlatmaqla müxtəlif uzaq məsafələri vuracaq silahlarını sınaqdan keçirməyə çalışdıqlarını deyib:

"Bu dəfəki müharibə ən yeni texnologiyalarla olacaq. Hər iki tərəf bir-birini əldən salmağa çalışacaq. Hələlik qısa müddətli kiçik müharibə başlatmaqla uzaq mənzilli silahlarını sınaqdan keçirməyə çalışacaqlar və böyük dövlətlərin işə müdaxiləsini gözləyəcəklər".

Politoloq bu tip addımların heç bir siyasi qərarın qəbul edilməsinə gətirməyəcəyini də deyib:

"Müharibə hər iki tərəf üçün fəlakətdir. Hər iki tərəf müharibədə itirəcək. Heç bir siyasi qərar qəbul edilməyəcək. Ermənilər özlərinə çox güvənirlər. Həmin dəqiqə Azərbaycanı məğlub edəcəklərini düşünürlər. Amma Azərbaycan da öz hərbi sferasına investisiyalar qoyur".