Türkiyəyə “diktatura”, Ərdoğana “diktator” deyənlər bir az utansınlar, dürüst seçki keçirən, uduzduğunu qəbul edən, səsə, seçiciyə önəm verən yerdə diktatura ola bilməz.

Axar.az xəbər verir ki, bu sözləri ekspert Natiq Cəfərli 31 martda Türkiyədə keçirilən bələdiyyə seçkiləri ilə bağlı açıqlamasında qeyd edib.

O bildirib ki, qardaş Türkiyəni ordu quruculuğunda örnək alırıqsa, təhlükəsizlik konsepsiyasında, xarici siyasətdə birgə addımlayırıqsa, idarəetmə sistemlərimizi də uyğunlaşdırmalıyıq – yerli önünüidarə sisteminə keçməli, mer institutunu təsis edib birbaşa seçkilər keçirməli, paralel olaraq da 14 iqtisadi rayonu inzibati ərazi vahidinə çevirərək valilik (Prezidentin şəxsi nümayəndəsi) institutu yaratmalıyıq:

“Türkiyə dünən demokratik ölkə yolunda addımladığını göstərdi, bu seçkidən sonra Türkiyənin Qərblə yaxınlaşması sürətlənəcək, iqtisadiyyatda yaranmış problemlərin tədricən həll edilməsinə şahidlik edəcəyik. Bu seçki həm də 2028-ci ildə Türkiyənin növbəti prezident seçkilərində ən güclü namizədin adını da açıqladı – İmamoğlu. Əkrəm bəy Ərdoğanın siyasi karyerasını eyni ilə təkrarlayacaq – o da İstanbulda mer olduqdan sonra siyasətin 1 nömrəsi oldu, son 22 ildə ölkəni idarə etməyi bacardı. Azərbaycan da bunu anlamalı, dövlətlərarası münasibətlərdə İmamoğlu faktorunu indidən hesaba qatmalıdır.

Türkiyədə dünənki seçki həm də Kılıçdaroğlunun ciddi məğlubiyyəti, köhnə CHP zihniyyətinin bitməyə doğru getməsi ilə yadda qaldı. CHP getdikcə daha çox siyasi olaraq “mərkəzə” yaxınlaşacaq, “soldan” addım-addım uzaqlaşıb “mərkəz” olacaq”.

Qeyd edək ki, ötən gün baş tutan yerli idarəetmə orqanlarına seçkilərdə hakim AKP əhəmiyyətli dərəcədə səs itirib və müxalif CHP-yə uduzub.