"Hazırda məsələ ilə bağlı araşdırma aparılır".

Bunu "Axar.az"a açıqlamasında Xarici İşlər Nazirliyinin Mətbuat katibi Elman Abdullayev deyib.

O, Gürcüstanda yaşayan azərbaycanlıların problemlərinin daim diqqət mərkəzində saxlanıldığını bildirib:

"Gürcüstanda yaşayan azərbaycanlıların gün-güzəranı ilə həmişə maraqlanmışıq. Gürcüstan misalında bizim səfirliyimiz, nümayəndəliyimiz daimi rayonlara səfər edərək, azərbaycanlıların problemləri ilə maraqlanırlar. Yenə də qeyd etmək istəyirəm ki, onlar bizim soydaşlarımızdır. Hazırda bununla bağlı məndə tam dəqiq məlumat yoxdur, amma səfirliyimizdə bununla bağlı araşdırma aparılır. Araşdırma bitən kimi ictimaiyyətə məlumat veriləcək".

Qeyd edək ki, bu gün saytımıza daxil olan məlumatda Gürcüstanın Qardabani rayonunun Candar kəndində azərbaycanlılara məxsus 300 illik tarixi qəbiristanlığın dağılmaq üzrə olduğu haqqında məlumat yer almışdı. Məlumatda həmçinin Gürcüstan hökumətinin bununla əlaqədar azərbaycanlıların müraciətini diqqətə almadıqları qeyd edilmişdi.