Ölkəmizdə böyük həvəslə gözlənilən Novruz bayramı maraqlı ənənələrə malikdir.

Axar.az xatırladır ki, bu ənənələrdən biri də Novruz süfrəsi ilə bağlıdır. Süfrədə adları "S" hərfi ilə başlayan yeddi nemət olmalıdır. Bura sumax, sirkə, süd, səməni, su, səbzi və s. aid etmək olar.

Bayramda masanın üstünə içərisi qoz-fındıq, şabalıd, şirniyyatla dolu xonça, güzgü və şamlar düzülür. Həmçinin güzgünün qarşısında boyanmış yumurtalar qoyulur. Bunların da öz rəmzi mənası var: şam - od, işıq deməkdir (insanı bədnəzərdən qoruyur), güzgü aydınlıq rəmzidir.

Başqa bir ənənəyə görə, bayram vaxtı hamı evdə olmalıdır. Xalq arasında "Əgər bayram günü öz evində olmasan, yeddi il evdə olmayacaqsan", - deyirlər.

Təzə ilin birinci günü bütün gecə işıqlar söndürülmür, çünki sönmüş od, yanmayan işıq bədbəxtçilik əlaməti sayılır.