Aralarında Rusiya vətəndaşı İsa Tupolovun da (əslən azərbaycanlıdır) olduğu terrorçu İŞİD qruplaşmasının 5 silahlısının fotosu Türkiyənin bütün təhlükəsizlik qurumlarına göndərilib.

Report-un məlumatına görə, onlardan biri cari ilin yanvarında İstanbulda Sultan Əhməd meydanında terror törədən Nabil Fadılın yaxın dostu 35 yaşlı Rəşid Alabdalah Algagandır. Digəri 32 yaşlı Abu Ayman At-Maghribindir. Onun ABŞ pasportu var, kod adı Darvan əl-Haymardır.

Dördüncü terrorçu-kamikadze Furkan Ürkməz yeniyetmə yaşındadır. O, 2015-ci ilin yayından öldürüldüyü ehtimal edilən İŞİD silahlısı Muhammed Ürkməzin qardaşıdır. Furkan Ürkməz bu il martın 6-da Suriyaya keçib.

Beşinci terrorçunun adı isə Hasan Hüseyn Uğurdur. O, "Vatsap"la "Şəhidlik sırası bizdə" mesajını paylaşıb.

Xəbərdə bildirilib ki, terrorçuların hamısı hazırda Suriya ərazisindədir. Məlumata görə, onlar Türkiyə və Azərbaycan ərazisində terror törətməyi planlaşdırırlar. İsa Tupolovun isə hazırda Suriyanın Rai şəhərində olduğu bildirilir.