Qarabağ separatçı rejimi itkilərinin etirafını davam etdirib.

Axar.az xəbər verir ki, separatçı rejimin yaydığı məlumatda 14 erməni tankının münaqişə zamanı məhv edildiyi bildirilib.

Silahlı-separatçıların "mətbuat xidməti"nin rəhbəri Viktor Arustamyanın sözlərinə görə, 29 erməni əsgəri öldürülüb, 101 əsgər isə yaralanıb. Arustamyan itkilərlə bağlı dəqiqləşmələrin davam etdiyini də vurğulayıb.

Bundan öncə Qarabağ separatçıları 20 erməni silahlının öldürüldüyünü, 72 silahlının yaralandığını, Ermənistana məxsus 7 tankın yararsız hala salındığını qeyd etmişdi. 26 erməni əsgərinin itkin düşdüyünü bəyan edən separatçılar həmçinin 8 strateji yüksəkliyin Azərbaycan Silahlı Qüvvələrinin nəzarəti altına keçdiyini də açıqlamışdı.

Qeyd edək ki, yalnız aprelin 4-ü gün ərzində və aprelin 5-i səhər saatlarınadək keçirilən əməliyyat tədbirləri və cavab atəş zərbələri nəticəsində ermənilər 170 nəfərədək canlı qüvvə sarıdan itkiyə məruz qalıb, 20-dək hərbi texnikası tam sıradan çıxarılıb.

Aprelin 5-də saat 12.00-dan etibarən Azərbaycan-Ermənistan qoşunlarının təmas xəttində tərəflərin razılığı ilə əməliyyatlar dayandırılıb.