Bakı həbsxanasında dindirilmə zamanı Ruben Vardanyana Ermənistanın Baş naziri Nikol Paşinyanın ona ünvanladığı ifadələrlə bağlı suallar verilib. Ailəsi ilə söhbətində ərizənin təsdiqini alan Ruben Vardanyan öz mövqeyini ictimaiyyətə açıq formatda paylaşmağı istəyib.

Axar.az xəbər verir ki, bu barədə Vardanyanın ofisi məlumat yayıb.

“Əvvəla, hər bir şəxs öz həyatının nümunələri və prinsipləri əsasında başqa bir insanın hərəkətləri haqqında düşünür.

İkincisi, baş nazirin mənə sualları olardısa, o, 2022-ci ilin noyabrında, hələ “arsaxın dövlət naziri” olduğum vaxtda (Vardanyan Qarabağ separatçı-terrorçularının qondarma qurumunda 108 gün “dövlət naziri” olub – red.) sonuncu görüşümüz zamanı onları soruşmaq imkanına malik idi. Bununla belə, onun istənilən sualına bacardığım qədər cavab verməyə hazıram.

Üçüncüsü, baş nazirə xatırlatmaq istərdim ki, 2018-ci ilin yazında, mən və tərəfdaşlarım ilk dəfə görüşəndə ​​və dörd nəfər olduğumuz zaman, mən həmişə ona sadiq qaldığım və davam etdirəcəyim üç məqamı səmimiyyətlə dilə gətirdim:

1. Biz və tərəfdaşlarımız Ermənistanın siyasətinə qarışmaq istəmirik və qarışmayacağıq.

2. Biz Ermənistan hakimiyyəti ilə münasibətimizdən asılı olmayaraq xeyriyyə işləri görürük, çünki biz bunu xalq üçün etmişik və edirik. Mənim üçün insanlara kömək etmək əsas vəzifə və humanitar missiya olaraq qalır.

3. Mənim yanaşmamı dəyişə biləcək yeganə şey “arsaxın” taleyidir.

2020-ci il hadisələri və “arsax”a qarşı davam edən təhdidlər mənim üçün dönüş nöqtəsi oldu, mən bunu həmişə açıq və ardıcıl şəkildə bildirdim. O vaxtdan bəri mənim bütün hərəkətlərim “arsax” və onun “xalqı”nın taleyi üçün qayğı ilə diktə edilib.

“İndi “xalqımız” öz tarixinin ən çətin mərhələlərindən birini yaşayır. Bütün çətinliklərə və fikir ayrılıqlarına baxmayaraq, mən inanıram ki, biz bu dövrü də keçib, sülh və işıqlı gələcək qura bilərik”, - Vardanyan bildirib.