Dağlıq Qarabağ məsələsi üzrə danışıqlar prosesinin bərpası üçün üç şərtin reallaşdırılması lazımdır.

Axar.az Tert.am-a istinadən xəbər verir ki, bu sözləri Ermənistan Prezidenti Serj Sərkisyan Ermənistan Respublika Partiyasının icraiyyə orqanının iclasında deyib.

"Danışıqlar prosesinin bərpası üçün əsas üç şərt mövcuddur: İnsidentlərin araşdırılmasına dair mexanizmlərin tətbiqi, ünvanlı bəyanat və Azərbaycanın Dağlıq Qarabağdakı əhaliyə qarşı yeni aqressiyaya və terrora getməyəcəyinə təminat".

Görüş zamanı Ermənistanın xarici siyasəti də əsas müzakirə mövzularından olub. İclas zamanı Sərkisyan apardığı son telefon danışıqları, eləcə də Azərbaycan-Ermənistan təmas xəttindəki vəziyyət haqda məlumat verib.

Qeyd edək ki, Sərkisyanın açıqlamasında iki məqam xüsusilə diqqət çəkir – ünvanlı bəyanat və Azərbaycanın Dağlıq Qarabağın erməni icmasına "terror etməyəcəyinə" zəmanət.

Ünvanlı bəyanat dedikdə, Sərkisyan dünya birliyindən Qarabağdakı son atəşkəs pozuntusunun səbəbkarı kimi Azərbaycanın adının hallandırılmasını istəyir. "Terror" açıqlaması isə ümumiyyətlə Sərkisyanın danışıqlar prosesinə qayıtmayacağını bildirən "şərt"dir. Xocalı qətliamı törədən, azərbaycanlılara qarşı soyqırım həyata keçirən, elə bu gün cəbhə bölgəsində 110 ev, məktəb, baxça dağıdıb, dinc əhalini qətlə yetirən qatil və terrorçu Sərkisyanın Azərbaycana qarşı bu cür mövqeyi sadəcə, həyasızlığın son həddidir.