Qarabağ separatçılarının lideri Bako Saakyan mayın 13-də Ağdərə rayonunun Madagiz qəsəbəsində olub.

Musavat.com xəbər verir ki, baş separatçı yerli sakinlərlə görüşüb, onların vəziyyəti ilə tanış olub, mövcud problemlərin həlli yollarını müzakirə edib.

Qeyd edək ki, 2-5 aprel döyüşlərindən sonra təmas xəttinə yaxın ərazilərdə yaşayan ermənilər yaşayış yerini tərk edib və geri qayıtmağa cürət etmirlər. Buna görə də separatçılar onları geri qaytarmağa çalışırlar. Ancaq B.Saakyanla bağlı xəbərin həqiqiliyi şübhə doğurur. Belə ki, mayın 11-də qondarma "DQR hökuməti"nin "baş naziri" Ara Arutünyan Ağdərədə bir qrup erməni sakinlə görüşündə hərbi əməliyyatlar zamanı köçənləri evlərinə geri qayıtmağa çağırmışdı. Lakin o, "mən Talış və Madagiz istisna olmaqla, bütün kənd icmalarının üzvlərini öz evlərinə geri qayıtmağa çağırıram", - demişdi.

Bu mənada onun mülki əhalini Azərbaycan əsgərinin mövqelərinə yaxın ərazidə yerləşən kəndə qayıtmağa çağırdığı inandırıcı görünmür.

Çox güman ki, oyuncaq "prezident" cəbhədə yaşanan gərginliklər səbəbindən təmas xəttinə gəlib. Elə onun səfəri ilə eyni vaxtda ermənilərin məhz eyni istiqamətdən Tərtərin mülki əhalisini top atəşinə tutması da təsadüfə bənzəmir.