Mayın 16-da qondarma "Dağlıq Qarabağ Respublikası"nın tanınması ilə bağlı qanun layihəsi Ermənistan parlamentinin xarici əlaqələr komissiyasında müzakirə olunacaq.

APA-nın xəbərinə görə, bu barədə "Panorama.am" saytına komissiyanın sədri Artak Zakaryan bildirib.

"Komissiyanın qanun layihəsinə verəcəyi rəy parlamentə təqdim olunacaq", - deyə Zakaryan bildirib.

Reqlamentə əsasən, qanun layihəsi parlamentə daxil olduqdan sonra o, parlamentin dördgünlük iclaslarının gündəliyi layihəsinə daxil edilir. Reqlament parlamentə üç qərardan birini qəbul etməyə icazə verir: gündəliyə daxil etmək, imtina etmək və təxirə salmaq.

Qeyd edək ki, Ermənistan hökuməti mayın 5-də "DQR"-in tanınması ilə bağlı qanun layihəsinə rəy verərək sənədi parlamentə göndərib.

Layihənin mayın 10-da parlamentdə müzakirəsi isə təxirə salındı. Rusiyanın da bu məsələyə sərt reaksiyasından sonra Ermənistan XİN müxalif deputatın təqdim etdiyi layihənin parlament tərəfindən qəbulu demək olmadığını açıqlamışdı.

16 mayda Azərbaycan və Ermənistan prezidentlərinin görüşü gözlənildiyi halda bu addım növbəti təxribat kimi qiymətləndirilə bilər. Belə ki, "DQR" tanınması Azərbaycana hərbi yolla ərazisini qaytarmaqdan başqa variant qoymur.