Azərbaycan Silahlı Qüvvələrinin real döyüş atışları icra etməklə, “İldırım” zenit-raket komplekslərini nümayiş etdirməsi Ermənistanda birmənalı şəkildə şok effekti yaradıb. Adətən istənilən məlumata şərh verən erməni ekspert-mütəxəssislər bu dəfə iflic vəziyyətinə düşüblər. Artıq ikinci gündür ki, onların susqunluğu davam edir.

Bu sözləri ehtiyatda olan polkovnik Şair Ramaldanov AzərTac-a açıqlamasında deyib.

Ş.Ramaldanov bildirib ki, düşmən tərəfinin əldə etdiyi “İsgəndər” raketlərinə Azərbaycanın “İldırım”la cavab verməsi özünü çox gözlətmədi. Maraqlıdır, qısa müddət “İsgəndər”lə öyünən Ermənistan rəhbərliyi indi öz xalqının başını yenidən hansı “oyuncaqla” aldatmağa başlayacaq?

“Ali Baş Komandan İlham Əliyevin yürütdüyü uğurlu siyasət nəticəsində güclü ordu quruculuğu, dövlətimizin iqtisadi inkişafı, demoqrafik üstünlük və digər amillər Ermənistanın Azərbaycan ilə ayaqlaşa bilməməsinə əyani sübutdur. Azərbaycanın hava məkanının eşalonlaşdırılmış mühafizəsi, ordumuzun silahlanmasına bundan sonra da qəbul ediləcək silahlar Ermənistan üçün sürpriz olacaq və düşmənin vahimə içində qalması şübhəsizdir. Düşmənin üzərinə yağdıracağımız raketləri onlar nə ilə zərərsizləşdirəcəklər? Bu, böyük sual doğurur”, - deyə ehtiyatda olan polkovnik qeyd edib.