Futbol üzrə 2018-ci ildə keçiriləcək dünya çempionatına vəsiqə qazanmaq uğrunda pley-off mərhələsinin ilk oyununda İsveçə səfərdə məğlub olan İtaliya millisinin müdafiəçisi Leonardo Bonuççi oyunun əsas hakimi türkiyəli Cüneyt Çakırı sərt şəkildə tənqid edib.

Axar.az xəbər verir ki, Bonuççi 1:0 hesabı ilə məğlubiyyətdən sonra türkiyəli referini xaraktersiz adlandırıb.

“Mənim burnumu qırdılar! Start fitindən cəmi 30 saniyə sonra Toyvonen artıq burnumu qırmışdı. Hakim ona qırmızı vərəqə göstərməli idi. Bu barədə başqa nə demək olar? Xarakteri olan hakim İsveç millisindən ən azı bir nəfəri meydandan qovmalı idi”, - Bonuççi deyib.