Bakıda "Böyük oyun" kiçik hesabla başa çatdı.

Axar.az xəbər verir ki, "Neftçi" - "Xəzər-Lənkəran" arasında oyun sonrası məğlub komandadan barışmaz açıqlamalar gəlib. XL-nin baş məşqçisi Oğuz Çətin deyib ki, çempionata pis başladıq, pis də davam edir:
"Bugünkü oyunun nəticəsi belə olmamalı idi. 3 xal itirmək çox pisdir. Qırmızı vərəqə və penaltidən sonra komandamız qol vurmalı idi. Futbolda nə qədər çalışsan belə, əsas iş qol vurmaqdır. Bizim hazırda ən böyük problemimiz qol vura bilməməkdir. "Neftçi" 10 adamla müdafiə olundu, biz isə qol vurmağa çalışdıq. İstənilən halda, məğlub olduq. Artıq bu oyun başa çatdı. Qarşıdakı oyunlara baxmalıyıq. Bizim məqsədimiz yaxşı oynamaq, qələbə qazanmaqdır".

Cənub klubunun qapıçısı Cahangir Həsənzadə təsadüfi qol buraxdıqlarını söyləyib:

"Bəxt amili tərəfimizdə deyildi. Nəticə oyuna görə olmadı. Biz bu gün məğlub olmamalı idik. Sadəcə, 11 metrlik zərbəni reallaşdıra bilmədik. Penaltini vursaydıq, ikinci hissədəki üstünlüyümüzdən də istifadə edib, qələbə qazana bilərdik. 11 metrlik zərbəsinin vurulmamağı psixoloji baxımdan komandaya təsir etdi. Buna görə də uşaqlar tələsirdi. Bu tələskənlik də yaratdığımız imkanları realizə etməyə mane oldu. Hamı gördü ki, oyun bizim üstünlüyümüz şəraitində keçdi".

"Ağ-yaşıllar"ın kapitanı Rahid Əmirquliyev isə rəqib komandanın kapitanı Flavinyo ilə aralarında baş verənlərə aydınlıq gətirib:

"Flavinyoya heç nə etmədim. O yıxılan zaman topla məni vurdu. Referinin mənə niyə sarı vərəqə göstərdiyini bilmirəm. Heç kimə heç nə deməmişəm, söyməmişəm. "Neftçi" ilə oyunda nəticə matça görə olmadı. Biz ən azı uduzmamalı idik".

Bir nüansı da demək lazımdır ki, oyunun sonlarına yaxın "Xəzər Lənkəran"ın futbolçusu Tyeqo de Xesus qırmızı vərəqə alıb və oyunu tərk edən zamanı azarkeşlərin təhqiramız şüarlarına tuş gəlib. Bu zaman futbolçu azarkeşlərə "orta barmaq" göstərib. Bu an futbol11.az saytının obyektivindən yayınmayıb.

Xatırladaq ki, çempionatda bir-birinin qənimi olan komandaların görüşündə flaqman 1:0 hesabı ilə qalib gəlib.