Donmuş şəlalələrdə buzadırmanma üzrə Açıq Azərbaycan Çempionatı keçiriləcək.

Azərbaycan Hava və Ekstremal İdman Növləri Federasiyasından Axar.az-a verilən məlumata görə, 31 yanvar-01 fevral 2015-ci il tarixlərində Federasiya və Gənclər və İdman Nazirliyinin birgə təşkilatçılığı ilə Qusar rayonunun Ləzə kəndi yaxınlığındakı donmuş şəlalələrdə Buzadırmanma üzrə Açıq Azərbaycan Çempionatı keçiriləcək.

Beynəlxalq federasiyaların tələbləri və şərtlərinə uyğun olaraq təşkil olunan çempionatda Azərbaycan Hava və Ekstremal İdman Növləri Federasiyasının nəzdində fəaliyyət göstərən Respublikanın müxtəlif bölgələrindən olan klubların idmançıları iştirak edəcək.

İlbəil iştirakçılarının sayı artan bu kimi yarışların ölkədə təşkili buzadırmanma idman növünün inkişafına, idmançılarımızın bu idman növü üzrə texnikasını təkmilləşdirməyə, eyni zamanda beynəlxalq idman dırmanması və buzadırmanma təşkilatları ilə Azərbaycan Hava və Ekstremal İdman Növləri Federasiyasının əlaqələrinin daha da genişləndirilməsinə şərait yaradır.