Millimizin heyətinə ilk dəfə dəvət olunan iki futbolçu danışıb.

Axar.az xəbər verir ki, "İnter"dən Arif Daşdəmirov, "Xəzər-Lənkəran"dan Ağabala Ramazanov Robert Prosineçkinin dəvətinə münasibət bildirib.

A.Daşdəmirov apasport.az-a deyib ki, dəvət gözləyirdi: "Ümumiyyətlə, Berti Foqtsun vaxtında da həmişə milliyə çağırılacağımı gözləmişəm. Çünki "İnter"in əsas heyət oyunçusuyam. Əgər klubunda oynayırsansa və səni milliyə çağırmırlarsa, bu, futbolçuya pis təsir edir. Şadam ki, Prosineçki məni də Antalya toplanışına cəlb edib. Əlimdən gələni edəcəm ki, onun etimadını doğruldum. Milliyə boş yerə çağırılmadığımı isbatlayacam. Gələn ay Malta ilə oyunumuz var. Həmin görüşə yüksək səviyyədə hazırlaşmalıyıq. Bunu edə bilsək, Maltaya qalib gələcəyimizi düşünürəm".

A.Ramazanovun sözlərinə görə, seçməyə çağırılacağını güman edib:

"Çünki Azərbaycana birinci dəfə gələndə "Bakı" ilə çempionat oyunumuza baxmışdı. Həmin vaxt Rəşad Sadiqov da "Xəzər Lənkəran"da idi. Çıxanda ikimizi soruşmuşdu, oynayıb-oynamamağımızla maraqlanmışdı. Bilirdim ki, diqqət mərkəzindəyəm və çalışırdım ki, üzərimdə daha çox işləyim. Bu seçmə mərhələdə qələbə və xalımız yoxdur. İnşallah, Malta ilə oyunda qələbə gələr. Hazırkı toplanış ərzində özümü elə göstərməliyəm ki, Prosineçki gələn ay da məni yığmaya çağırsın".